Halo notisia ne’e fasil ?

Fahi husik deit

La fiar? Hare took ambiente iha ita nia bairo ou ita nia familia rasik. Se iha ambiente ita nian halo hela limpeza jeral. Koko atu akompana ho didiak. Lista hela se mak lidera programa limpeza refere. Ema nain hira mak involve iha atividade ne’e no sa ida deit mak sira halo. Keta haluha mos hakerek oras atividade limpeza refere realiza.

Ita foti izemplo. Limpeza ne’e chefia husi xefe Aldeia no partisipa iha atividade ne’e ema nain 25 nebe mai husi komunidade iha aldeia ne’e  duni. Oras halao atividade ne’e iha Sabadu 20 Janeiru 2018. Komunidade sira hamos valeta husi foer sira, sunu foer nomos hamos ambiente aldeia.

Hafoin lista hotu tiha, mai ita formula ho formula notisia  antigu maibe famozu tebes, mak 5W + 1 H.
Sa mak 5W + 1H ne’e?
What = Sa?
Who = Se?
When = Bainhira?
Where = Iha nebe?
Why = Tamba sa?
How = Oinsa?
Responde pergunta refere tuir lista nebe ita halibur ka rekolha ona.
Izemplo hanesan ne’e :
What = Limpeza
Who = Xefe Aldeia ho komunidade 25
When = Sabadu , 20 Janeiru 2018
Where = Iha Aldeia Mundo Perdido Suco Manleuana Municipiu Dili.
Why = Ambiente foer tamba lixu no prevene inundasaun iha tempu udan.
How = Halo Limpeza
Mai ita forma sai sentensa ;
Xefe Aldeia no komunidade 25 halo limpeza iha Aldeia Mundu Perdidu, Suco Manleuana, Municipiu Dili, Sabadu (20/01-2018). Atividade limpeza ne’e hodi hamos lixu nebe halo entupimentu ba sirkulasaun be’e iha valeta sira iha aldeia laran.

Paragrafu ne’e bele sai ona notisia ida. Fasil tebes halo notisia ?